Алматыдағы Назарбаев зияткерлік мектебінен (НЗМ) 11-сынып оқушысының шығарылуына қатысты дау жалғасты
Мән-жайы
23 мамырда Алматыдағы Назарбаев Зияткерлік мектебінің 11-сынып оқушысы мектептен шығарылды. Бұған емтихан кезінде тәртіп бұзу және мұғалімді «Ш» әрпінен басталатын балағат сөзбен атау себеп болған.
Бұл оқиға қоғамда үлкен резонанс тудырды. Келесі күні жасөспірім видеоүндеу жазып, бірнеше рет мұғалімнен кешірім сұрағанын айтты. Оның пікірінше, мектеп директоры мұғалімдер мен ата-аналар арасында оның беделіне нұқсан келтіретін жалған ақпарат таратып жатыр.
«Мен салдарынан қашпаймын, тәртіптік жазаны қабылдауға дайынмын. Қоғамдық жұмыс немесе басқа да шаралар болсын – тек осы мектепте қалып, білімімді жалғастыруға мүмкіндік берілсе екен деймін. Мен бұл білімді бағалаймын», – деді оқушы.
Жасөспірім ауруханаға түсті
Кейін қоғам белсендісі Аида Букаева оқушының жағдайы күрт нашарлағанын хабарлады.
«Сұңқар құрысып, жүйкесі сыр беріп, қызуы түсіп кеткен. Ол 21-інен бері тамақ ішпеген. Қазір оны жедел жәрдеммен ауруханаға алып бара жатыр. Ол бүгінге дейін ертеңгі МӘСҚ емтиханын тапсырамын деп үміттеніп келді. Тапсыра алмайтынын түсінген соң, жағдайы нашарлап кетті», – деді ол.
Балалар құқығы жөніндегі өңірлік уәкіл Диана Ерлан жасөспірімнің ауруханаға жатқызылғанын растап, әкесімен келіскенін айтты:
«Баланың әкесімен байланысқа шықтым. Ауруханадан шыққан соң психологиялық қолдау көрсетуге уағдаластық. Баланы ауруханаға жатқызған, жағдайы тұрақты. Ертең мектепте ата-аналардың кездесуі өтеді».
Алматы Денсаулық сақтау басқармасы бұл жағдайға қатысты түсініктеме беруден бас тартты.
Министрлік ұстанымы
Осы арада Оқу-ағарту министрлігі де ресми мәлімдеме жасады. Ведомство мұғалімге құрмет көрсету маңызды екенін атап өтіп, адамгершілік ұстанымдарға шақырды.
«Қазақстанда мұғалімнің мәртебесі заңмен бекітілген және оның қоғамдағы ерекше рөлін көрсетеді. Ата-аналар мен оқушылар ұстазға құрметпен қарауы тиіс. Білім беру жүйесіне сенім – осы жүйеде жұмыс істейтін адамдарға сенімнен басталады. Мұғалімнің кәсіби абыройына нұқсан келтіруге жол берілмейді. Оқу-ағарту министрлігі педагогтың мәртебесін төмендететін кез келген әрекетті қатаң айыптайды», – делінген хабарламада.
Сондай-ақ министрлік оқушы өз қателігін түсінгенін атап өтті.
«Бұл жағдай бойынша НЗМ ішкі нормативтермен қатар, адамгершілік пен педагогикалық кәсібилік қағидаттарын ескере отырып шешім қабылдайды деп сенеміз».
Оқу-ағарту министрі Ғани Бейсембаевтың тапсырмасымен мектепке Балалардың құқықтарын қорғау комитеті мен аумақтық департамент өкілдері жіберілген. Министр НЗМ басқарма төрағасы Ануар Жанғозинмен де келіссөз жүргізген.
«НЗМ басшылығы мектепке жедел барып, жағдайды объективті бағалап, болған оқиғаның себептерін жан-жақты талдап, білім беру жүйесінің рәсімдері мен құндылықтарына сай шешім қабылдауға уәде берді», – делінген министрлік мәлімдемесінде.
ДЕРЕККӨЗ: TENGRINEWS