Компания басқаратын 2-ЖЭО жылыту маусымына дайын болмаған.
«АрселорМиттал Теміртау» (АМТ) басқаратын Теміртау қаласындағы 2-ЖЭО-ға жылу беру маусымына дайындығы туралы сертификаттар берілмеген, деп хабарлайды Inbusiness.kz сайты Қарағанды облысы бойынша энергетикалық қадағалау басқармасына сілтеме жасап.
Кәсіпорын №4,5 қазандықтарды күрделі және орташа жөндеу кестесін өткізіп алған. Сондай-ақ, №1 қазандықта жөндеу жұмыстарының сметасында тот баспайтын болаттан емес, қара металдан жасалған таза газ құбырын орнату қарастырылған.
«Компания ЖЭО-2 жаңа құйындылар мен бұрағыштардың (эмульгаторлардың негізгі элементі) орнына 16 жылдан астам жұмыс істеп тұрған және көзге көрінетін ақаулары бар қолданыстағы қондырғыларды пайдалануды ұйғарған. №5 қазандықта компания 12 коллекторды ауыстырмай, тазалаумен шектелген. №3 қазандықтан мұржаға дейінгі газ құбырының жылу оқшаулауы, қазандық цехының шатырын жөндеу жұмыстары аяқталмаған», делінген хабарламада.
Сондай-ақ басқарма №3 турбогенератордың күзгі-қысқы кезеңде іске қосылмау қаупі жоғары екенін атап өтті, өйткені статор орамаларын жеткізушімен келіссөздер кешіктірілген.
АМТ осы заңбұзушылықтар үшін 1 миллион теңге әкімшілік айыппұл төлейді. Жылу электр орталығының жылу беру маусымындағы жұмысын басқарма ерекше бақылауға алды.
Дереккөз: Inbusiness.kz