Бүгін, 25 қаңтар Канвон қаласында (Оңтүстік Корея) жасөспірімдер Олимпиадасында Қазақстан мен Аустрия құрамалары арасында 3х3 хоккей турнирінде үшінші орын үшін матч өтті.
Кездесу 6:5 (1:4, 2:1, 2:1) есебімен қазақстандық хоккейшілердің жігерлі жеңісімен аяқталды. Осылайша Қазақстан жасөспірімдер құрамасы қола жүлдеге ие болды. Сонымен қатар командамыз топтық кезеңдегі жеңілісі үшін аустриялықтарға есе қайтарды. Бұл Қазақстан үшін Канвон Олимпиадасындағы үшінші медаль. Бұған дейін Илья Мизерных шаңғымен секіруде алтыннан алқа тақса, Полина Омельчук шорт-тректен қола жүлдегер атанды.
Айта кетейік, 3х3 хоккей турнирінде финалда Латвия мен Дания құрамалары кездеседі.
Өкінішке қарай, бүгін конькимен жүгіруден Қазақстан ұлттық құрамасы Канвондағы жасөспірімдер арасындағы қысқы Олимпиада ойындарында аралас эстафеталық финалға өте алмады.
Отандық конькишілер жартылай финалдық жарыстан шеттетілді. Төрт команда ғана жолдама алған финалдағы мүмкіндіктерін уыстан шығарып алды. Ал жартылай финалда үздік нәтиже көрсеткен Нидерланды, Оңтүстік Корея, Қытай және Жапония спортшылары жүлделі орындарды сарапқа салады. Шешуші бәсеке бүгін кешке өтеді. Аталмыш жарысқа еліміздің атынан Кристина Шумекова мен Руслан Жанаділов қатысты.
Дереккөз: Insports.kz