Компания өкілдері жеке деректер туралы заңның бұзылуы мүмкін екенін және уәкілетті органдар тарапынан ешқандай хабарлама болмағанын мәлімдеді.
Алматы қаласындағы 200-ден астам мемлекеттік мектептің оқушыларына, ата-аналарына және педагогтарына қатысты деректер Kundelik.kz жүйесінен Bilimland білім беру платформасына пайдаланушылардың келісімінсіз көшірілген. Бұл туралы inbusiness.kz сайтына берген эксклюзивті сұхбатында Kundelik.kz компаниясының CEO-сы әрі негізін қалаушы Мұхтар Ильясов мәлімдеді, деп хабарлайды inbusiness.kz.
Оның айтуынша, ата-аналар да, мектептер де жеке деректердің берілуі жөнінде ресми хабарлама алмаған, ал платформаны ауыстыру туралы шешім ашық қоғамдық талқылаусыз қабылданған.
«Бүгін біз Kundelik жүйесіндегі барлық жеке деректеріміздің қандай да бір түсініксіз жолмен басқа жүйеде пайда болғанын біліп отырмыз. Алматы қаласының білім басқармасы тарапынан ешқандай ресми хабарлама болған жоқ, бұл мәселе бойынша ешқандай жиналыс та өткізілген жоқ», — деді Ильясов.
Ол жеке деректерді балама платформаға беру үшін түпкі пайдаланушылар — ата-аналар мен оқушылар тарапынан келісім алынбағанын ерекше атап өтті.
Оқиға жүздеген мың бала мен ата-ананың деректерін қозғайды.
Компанияның мәліметінше, ақпараттың берілу ауқымы білім беру үдерісіне қатысушылардың өте көп санын қамтиды.
«Бұл жеке деректердің үлкен бөлігі. Алматы қаласындағы 219 мемлекеттік мектеп туралы сөз болып отыр. Ол мектептерде шамамен 310 мың бала оқиды, 25 мыңға жуық мұғалім жұмыс істейді, сондай-ақ 250 мыңға жуық ата-ананың деректері бар», — деді Ильясов.
Оның айтуынша, деректердің берілу тәсілі ерекше алаңдаушылық туғызады. Kundelik.kz CEO-сының мәлімдеуінше, ақпаратты мектептер өздері жүктеп алып, қорғалмаған тасымалдағыштарда сақтаған.
«Бұл деректерді мектептердің өздері жүктеп алып, флешкаларға, мұғалімдердің үйдегі компьютерлеріне сақтап, кейін білім басқармасына тапсырған. Біз мұны ата-аналар мен педагогтардың телеграм-чаттарындағы хабарламалардан, соның ішінде дауыс хабарламаларынан тіркедік», — деді ол.
Компания мемлекеттік органдарға жүгінгенін хабарлады
Мұхтар Ильясов компания уәкілетті мемлекеттік органдарды болып жатқан жағдай туралы хабардар еткенін және Алматы қаласының білім басқармасына ресми сұрау салғанын айтты. Алайда, оның сөзінше, әзірге жауап алынбаған.
«Қазір біздің барлық сұрақтарымыз толықтай елеусіз қалдырылып отыр. Сонымен қатар, бүгін біз де сіздер сияқты, Алматы қаласының білім басқармасы барлық мектептерді Kundelik жүйесінен Bilim-класс жүйесіне көшіргені туралы ақпаратты БАҚ-тан біліп отырмыз», — деп қосты Мұхтар Ильясов.
Бұған дейін білім комитеті көшу туралы шешімді мектептердің өздері қабылдағанын хабарлаған. Алайда Kundelik.kz өкілдерінің айтуынша, жеке деректерді берудің заңдылығы мен ата-аналардың бұл туралы хабардар етілу мәселесі әлі де ашық күйінде қалып отыр.
Дереккөз: inbusiness.kz